Lawng lianin Suez Canal a dang

Taiwan company Evergreen Marine lawnglian, Ever Given chuan Suez Canal a dan avangin bungraw phur lawng tam tak an tangkhang mek. 

Ever Given hi khawvela bungraw phur lawng lian ber zinga mi niin, ton 2,00,000 zeta rit a ni a, he lawng sei zawng hi football ground pali chen zet a ni. 

Suez Canal hi khawvela trade route lun ber zinga mi niin, khawvel huapa insumdawn tawnna 12% vel chuan he canal hi an paltlang a ni. Mahse Ever Given lawnglian avang hian lawng dang 160 chuang an tangkhang mek a, an zingah hian bulk carrier 41 leh crude tanker 24 an tel. 

Shipping company ṭhenkhat chuan an lawngte chu kawng dangah an kal tir a, mahse an kaltirna hi mel 3,500 zeta a thui belh thu leh, ni 12 hun an hman belh a ngaih dawn thu an sawi. International shipping associa­tion, BIMCO chuan lawng tam tak dan khawtlai an nih avang hian supply lamah nghawng a nei nasa dawn niin an sawi. Ni khata bungraw an dan beh USD tluklehdingawn 9.6 hu vel zel niin an sawi a ni. 

Lawng lian hi a tanna aṭang hian lakchhuah tuma beih mek ni mah se, mithiamte chuan kar eng emaw chen hun a la ngaih an rin thu an sawi.