Ram 12 defence hotuten Myanmar sipaite an dem

Ram 12 defence hotute chuan thuchhuah inṭawm siamin, Myanmar sipaite an dem thu an sawi. 

Kumin February 1-a civil sorkar paithlak a nih khan Myanmar mipuite chuan an rama democracy tundin a nih theih nan sipai sorkar laka an lungawi lohna te an lantir a, sipaite hi a tirah rawng takin che lo mah se hun a lo kal zel hnuah chuan sipaite chet dan chu a rawng chho tawh hle a ni. Media lam chuan February 1 aṭang khan sipaite kut tuarin civil mi 423 vel an thi tawh niin an tarlang. 

Nimin khan ram 12 - US, UK, Germany, Italy, Denmark, Greece, Netherlands, Canada, Australia, New Zealand, South Korea leh Japan defence hotute chuan Myanmar sipaite demna thuchhuah hi siamin, ralthuam hmanga ralthuam nei ve lo mipuite chunga sipaite chet dan an dem thu leh, sipaite thawhpui security service-te pawh an dem thu an tarlang a ni. 

Defence hotute chuan civil mite chunga sipaite chetna hi titawp turin an ngen a, inremna kawng dap turin sipaite chu an ngen. Professional military chuan an zawm tur international standard a awm thu Defence hotute chuan tarlangin, he standard-ah hian civil mite nghaisakna a tel lo a, mipuite venhimna tur a tel zawk a ni, an ti. 

Armed Forces Day-ah mi 114 kap hlum
Myanmar sipaite chuan kar liam ta Inrinni khan Armed Forces Day hmangin, an ram khawpui Nay Pyi Taw-ah mili­tary parade an nei. Armed Forces Day hman ni hian sipaite chuan khawpui  hrang hrangah sipai rorelna duh loa nawrh huaihawt mi 114 an kaphlum. Hei hi sipai rorelna duh lohna lantir a ni hnua ni khatah sipai kut tuara thi an tam ber ni a ni. 

Armed Forces Day hmanpui tur hian ram pariat chauhin palai an tir a, China, Pakistan, Bangladesh, Vietnam, Laos, Thailand, Russia leh India palaiten an hmanpui a ni. Russia hian a deputy defence minister a tir a, a bak ram dangte hian local embassy aṭangin palai an tir thung. Democracy thlawptute chuan ram dangten palai an tir chu an dem thu an sawi nasa hle a, a bikin khawvela democracy ram lian India-in palai a tir ve chu mak an tih thu an sawi. 

Nobel Peace Prize dawng turin CDM nominate
Myanmar rama democracy sorkar tundin a nih leh theih­na atana sipai rorelna dodal­na lantira hma la tu, civil dis­obedience movement chu khawvela chawimawina sang, 2022 Nobel Peace Prize dawng tura nominate a ni. 

University of Oslo-a socio­logoy professor Kristian Stoke chuan he movement hi February 1-a Myanmar sipaiten civil sorkar thuneihna an hnehchhuh duh lohna lantir a, tharum hmang loa hma la tu a ni, a ti. He movement hi a hlawhtling a nih chuan Myanmar ram chhung chauh ni lo, ram dangah pawh pro-democracy movement chu tharum leh thisen chhuahna hmang loin a kalpui theih zia an lantir thei dawn a ni, a ti. 

Norwegian Nobel Commi­ttee hian deadline January 31 hmaa nomination thehlutte chauh a pawm thei a, hei vang hian Stoke leh midang panga-in CDM an nominate-na hi kumin atan chuan pawm a ni tawh lo a, kum 2022 atan zawk pawm a ni thei a ni. Nomination hi ram hrang hranga parliamentarian leh minister, Nobel prize lo dawng tawhte leh university ṭhenkhat pro­fessor-ten an thehlut thei a ni.