Ever Given vangin lawng 300 chuang la tangkhang

Khawvela tui kaltlanga insumdawn tawnna kawng lun ber, Suez Canal a lawng lian tang mek Ever Given vangin lawng tangkhang 300 chuang an la awm mek.

He lawng hi kar liam ta Thawhlehni (March 23) khan Suez Canal-ah hian a tang a, lawng hi metre 400 (1,300ft) laia thui a nih vang hian sum­dawng lawng dangte kalna tur a dan pin avangin sum­dawng lawng tangkhang 300 chuang a awm phah a ni.

Suez Canal Authority (SCA) chairman Osama Rabie chuan lawng tang mek hi nimin tlai lamah kha chuan tlem tlema a tawlh sawn theih an rin thu a sawi a, lawng hi a chet sawn theih nan kar liam ta Inrinni thleng khan Canal kianga ṭiauvut tonne 20,000 chuang laih a ni tawh a, tugboat 14 hmangin Ever Given hi a chet theih nan a sir aṭanga pawh a ni bawk. 

Khawvela insumdawn tawnna 12% hi Suez Canal kaltlanga neih a ni a, he Canal hian Europe leh Asia insumdawn tawnna kawng ṭha tak a siam a ni. Tun hma khan South Africa chhim lama awm Cape of Good Hope aṭangin insumdawn tawnna hi Europe leh Asia khan an lo nei ṭhin a, mahse Suez Canal kawng hi a tlang tak hnuah a awlsam zawk avangin he canal kaltlanga insumdawn tawnna chu a lun phah ta zawk a ni.