CLC-in Suu Kyi chawimawina hnuk kir

City of London Corporation (CLC) chuan kum thum kal taa Myanmar State Counsellor, Aung San Suu Kyi hnena chawimawina a lo pek tawh, Honorary Freedom award chu a hnuh kir sak ta.

CLC hian kum 2017 khan tharum thawhna tel loa Myanmar rama democracy tundin a nih theihna tura hun rei tak  a lo beih tawh avang leh, mipuite thlamuang tak leh him taka an awm theihna tura a hmalakna avangin Suu Kyi hnenah chawimawina hi a hlan a ni. Mahse chawimawina a hlan hi a hnuk kir sak leh ta a ni. 

CLC-in Aung San Suu Kyi chawimawina a hnuk kir chhan hi kum 2016, October thla khan Myanmar-a Rakhine state-a police post beih a nih avangin kum 2017, August thla khan security force-te chuan Rohingya muslim-te lakah beihpui an thlak let vang a ni. Myanmar sipaiten beihpui an thlaknaah khan Rohingya 400 vel tihhlum an ni a, mi nuai sarih chuang zet chu Bangladesh ramah an tlanchhe bawk. 

Rohingya Muslim-te laka beihpui thlaknaah hian sipai hotute pawh inhnamhnawihin, Myanmar sorkar pawhin a sipaite thlavang hi a hauhsak a ni. Rohingya te chunga thil thleng chungchanga demna lam hawi thu a sawi chhuah loh avangin Suu Kyi hian sawisel pawh a lo tawk fo tawh a ni. 

UN chuan Rohingya-te hian security force-te lak aṭangin pawngsual, nghaisak leh thahte an tawk niin a report a, mahse UN report hi Myanmar sorkar chuan a pawmsak lo.