WHO-in Covid-19 thununna tura hma la turin ram hrang hrang a ngen
World Health Organization (WHO) chuan Ningani khan thuchhuah siamin khawvel ram hrang hrangte chu Covid-19 thununna kawnga hma lak ngaihna ṭul ang anga hma la turin a ngen.
Hmalakna tura ngenna a siam zingah hian a veite hriatchhuah an nih theihna tura hmalak te, a veite nena inchiahpiah loh te pawh a tel. WHO Health Emergency hotu Maria van Kerkhove chuan China-ah chuan mitinin inven dan an thiam tawh tih leh hri leng thunun dan tur pawh an thiam tawh hle tih a sawi. Hetihlai hian ram ṭhenkhat chuan Covid-19 hi an la thutak tawk lo niah a ngai thung. Ram tam takah chuan kai thar an pun belh zel a, heng ramte hian tih theih nei lo niin an inngai nge, an la thutak tawk lo tiin Kerkhove chuan a sawi. Singapore leh Vietnam-ah pawh China ang thoin an fimkhur thiam hle tawh tih a sawi bawk.
v Novel coronavirus dona kawngah Shanghai-ah chuan volunteer 2,06,900 vel zet an awm.
v Covid-19 len ṭanna ram China-ah chuan nimin khan kai thar 143 finfiah an ni.
v Khawvel pumah Covid-19 vei 98,436 finfiah a ni tawh a, mi 3,387 thi tawhin 55,641 lai an dam leh tawh.
v China-ah chuan hrileng kai 80,555 an awm a, 3,042 an thi tawh bawk.
v Ram 90 laiah Covid-19 hi a darh tawh a ni.
US-in Covid-19 test kit a mamawh ang zat a nei lo
Khawvel ram ropui bera ngaih United States chuan Covid-19 test kit a mamawh ang zat a nei lo!
White House pawhin nimin khan hemi chungchangah hian thuchhuah siamin test kit an nei tam tawk lo tih hi an pawm a ni. US vice president Mike Pence chuan an tum ang zat, test kit maktaduai khat tal neih an tum chu tunkar chhung hi chuan an nei tling hman dawn lo tih a sawi. US-ah pawh hri leng vang hian Ningani khan mi 12 lai an thi tawh a, hri kai 200 chuang an awm tawh bawk a ni.