Russia leh Turkey-in inkahhai puang

Russia khawpui Moscow-ah Russia president Vladimir Putin leh Turkey president Recep Tayyip Erdogan-te chuan darkar ruk zet inbiakna an neih hnuah, ram pahnihte chuan Ningani khan Idlib province-ah remna a awm theih nan inkah hai an puang.

Thla hlui khan Syria hmarchhak lama awm Idlib province-ah Syria sipaite chuan Turkey sipaite chu thlawhtheihna hmanga beiin, sipai 33 an thahsak a, he thil thleng vang hian Turkey leh Russsia inkar buaina a punlun rin a ni. Mahse vanneih thlak takin ram phahnite chuan inkahhai puan an rem ti dun ta a ni.  

Idlib province-ah hian nikum December thla aṭang khan buaina a chhuak fo a, Russia thlawp Syria sipaite hian he hmuna sorkar lak helte awmhmun khuarna zawng zawng chu hnehchhuh an tum a ni. Idlib province-ah hian Syria president Bashar al-Assad duh loh avanga tualchhung buaina chhuak a ni a, he province kianga khua Hama, Latakia Aleppo leh jihadist-te chuan Assad hi an duh lo a ni. Kum nga liam ta khan Idlib-ah hian Russia puihna nen Syria sipaite chuan hmun tam zawk chu an la let nual tawh a ni. Syria raltlante hi Turkey leh Syria ramri a awm Idlib aṭangin Europe-ah an lut ṭhin a, Idlib-ah hian pem lut an tam avangin he hmuna cheng hi an tam phah bawk. 

Russia leh Turkey-te hian inkaihai puang mah se, Syria sipaiten inbeihna an thlen leh fo a nih chuan hma lak an hre dawn loh thu Turkey president Erdogan chuan a sawi. Russia president Putin pawhin Turkey nena thawhdun chu duh lo mah se, Idlib hmuna remna leh muanna a awm theih nan inkahhai hi kan puan a ṭul a ni, a ti.