Israel-in Gaza ramri hawng

Israel chuan kar khat dawn Gaza Strip ramri a khar hnuah Pathianni aṭang khan a hawng leh ta. 

Gaza Strip aṭanga rocket hmanga Israel beih a nih vangin Israel chuan a chhang let nghal a, Gaza-a roreltu, Palestinian pawl Hamas-te hmun pawimawh eng emaw zat a kah chhiatsak a ni. Hei bakah hian Gaza kalpawh theih lohin kar kalta Thawhṭanni aṭang khan ramri a kharsak bawk. 

Pathianni zing aṭang khan Erez crossing leh Kerem Shalom crossing chu hawn a ni a, heng ramrite hi mihring inkalpawhna atana hawn a nih bakah bungrua te pawh lakluh theih a ni leh ta bawk a ni. Inrinni khan Palestinian mi tam tak chuan Gaza leh Israel inri-na bulah kawng zawhin, Israel-in Palestinian ram a luahsakte chu a neitu dik takte  hnenah pek kir leh an phut a ni. Inrinni zan khan Gaza Strip aṭangin Israel lamah rocket panga kahchhuah a ni leh a, Israel tank-ten Hamas military post-te an kap let nghal bawk. Mahse rocket leh tank hmanga an inbeihnaah hian thi leh hliam an awm report a awm lo. 

Egypt chuan Israel leh Hamas te inkara inkahhai puan a nih theih nan hma a la mek a ni. Hetihlai hian Arab hruaitute chaun tunhnaia US-in Syria-a Golan Heights ram neitua US a pawmna thu a puan chu an dem thu sawiin, hei hian Palestinian state din a nih theihna tura hmalakna a tichhe zawk dawn niin an sawi.