Gambia president hlui dollar mtd 362 ru-ah puh

Gambia ram president hlui Yahya Jammed chu kum 22 thuneihna a chelh chhungin sorkar sum dollar maktaduai 362 zet ru a puh a ni. Jammed thubuai hi  kum hnih dawn chhui a ni tawh. 

Jammed hian kum 1994 khan sorkar paihthlain thuneihna a chelh zui a, kum 2017-a inthlana a chak loh hnuah Equatorial Guinea-ah a tlanchhe zui a ni. 

Justice Ministre Abubacarr Tambadou chuan Jammed thubuai chhuitu, commission of inquiry report tlangpui hi a sawichhuak a, mahse he report hi mipui hmuh theih tura tlangzarh a la ni lo. Thuhretu mi 253 an kawmna behchhanin he report hi siam a ni. Jammed hian report chungchang hi a sawi ve lo a, mahse Gambia ramah amah thlawptute chuan an pawm loh thu leh, Jammed tihchhiat tumna a nih thu an sawi. 

Jammeh thubuai chhuinaah hian an ram chhung leh ram pawnah a hming hian ram 281 zet a nei niin an sawi a, heng zingah hian US-a in a neih pawh a tel. Kanilai khuaa a thil neih hlut zawng ringawt pawh dollar maktaduai 28.2 hu nia sawi a ni. 

President hlui hian account lem siam hmangin central bank aṭangin national tele-communications agency leh  state institution dang sum tam tham tak a ruchhuak nia puh a ni. Tambadou chuan sorkar chuan a pawisa rukte hi hmuhkir leh ngei tumin theihtawp a chhuah mek tih a sawi bawk.