Britain Parliament-in Brexit chungchangah inremna siam thei lo

European Union aṭanga Britain inlakchhuah dan tur chungchangah Britian MP-te chuan inremna an siam thei lo a, Parliament-a rawtna siamte chu hnawl zel a ni. 

Britian Prime Minister Theresa May leh EU hruaituten inremna an siam, Withdrawal Agreement chu Parliament-ah hian vawi thum hnawlsak a ni tawh. Hemi hnu hian rawtna dang siamin, EU chhuahsan hnuah EU hnena customs lama thawhdun zawm zel rawtna pawh ngaihtuah niin hnawl a ni leh bawk. Inremna siam hrang hrang an ngaihtuah tawh zingah a duh lama vote hmu hnem ber chu ngaihtuah ṭhat leha vote lak leh rawtna pawh hnawl a ni bawk. 

Brexit minister Steven Barclay chuan Parliament-ah rawtnate hnawl zel a nih vangin inremna mumal awm loin April 12-ah EU chu an chhuahsan mai a ngai dawn a, hei hi international business tan thil ṭha lo tak a ni dawn a ni, a ti. Hei vang hian inremna mumal tak hmanga EU chhuahsan a nih theih dan tur hi ngaihtuah a ngai takzet tih a sawi.