US-in Turkey hnena F-35 hmanrua pek tur titawp

United States chuan Turkey hnena F-35 fighter aircraft hmanrua a pek tur chu a titawp. Hei hi Turkey-in Russian missile defence system lei a tum avangin US chuan a hrekna tura a hmalakna hmasa ber a ni. 

US official-te chuan Turkey hnenah hian tuna an dinhmunah chuan F-35 hmanruate chu an thawn chhunzawm thei lo tih an hrilh a ni. Pentagon pawhin Turkey tana an thil thawn hi tihtawp a nih tih a nemnghet tawh bawk. 

Hetihlai hian Turkey President Tayyip Erdogan chuan Russia S-400 missile defence sytem lei an tum chu an ṭhulh dawn lo tih a sawi. Turkey hian S-400 hi July thlaah an lalut thei dawn niin a sawi. 

US leh NATO ram dang, F-35 neite chuan Turkey-in Russia S-400 missile system a neih chuan fighter jet awmna leh a hnuhma-te awlsam takin a chhui thei mai dawn niin an ngai a, an duh lo hle a ni. US chuan Turkey-in S-400 a lei tum hi ṭhulh tir tumin America sia Patriot anti-missile system chu man tlawm zawka leitir tumin a zawrh a ni. Turkey hian Patriot system hi duh tho mah se, S-400 lei ṭhulh phah nan chuan a duh lo thung.