Myanmar : Activist-ten chi bing helpawlte puihna ngen
Myanmar-a sipai rorelna duh lohna lantira nawrh huaihawtte chungah sipaite chet dan a rawng chho telh telh a, hei vang hian activist-te chuan chi bing hel pawlte chu sipai duh lohna campaign an neih mekah pui turin an sawm.
Kar liam ta Inrinni khan sipaiten rorelna an lak hnuah ni khatah sipai kut tuara nawrh huaihawt thi an tam ber ni a ni a, sipaite silai hmehpuahah mi 114 an thi a ni. Pathianni khan sipai kut tuara thi vuina inkhawm nei laite chu sipaite hian an kap leh bawk.
Nimin khan Yangon bulah nawrh huaihawtte chu sipaiten an kap leh a, mi pakhat thiin mi dang eng emaw zatin hliam an tuar niin Democratic Voice of Burma chuan a tarlang. Nimin khan Bago, Minhla leh Khin-U bakah chhim lamah Mawlamyine leh khawchhak lamah Demoso-ahte nawrh huaihawt chhunzawm a ni a, mahse pungkhawm an ṭhahnem lo a, buaina chhuak report a awm lo bawk.
Sipai rorelna duh lohna lantira nawrh huaihawttu pawl, General Strike Committee of Nationalities (GSCN) chuan Facebook kaltlangin open letter an tichhuak a, an ram chhunga chi bing pawl hrang hrangte chu sipaite rorelna dik lo duh lotute thlawp a, pui turin an ngen. Chibing helpawlten lungrual taka mipuite venhim hna an thawh a ngai a ni, a ti.
Myanmar-ah hian kum tak tam tak chu thuneihna sang zawk phut a, inlakhran duh chi bing helpawl eng emaw zat an awm a ni. An zinga ṭhenkhat hian sorkar chu inkahhai puan pui tawh mah se, tun hnaia an ram khawchhak leh hmar lamah sipai leh helpawlte hi an inkap leh a ni. Kar liam ta kartawp lam khan helpawl upa ber, Karen National Union (KNU) leh sipaite chu Thailand ramri bulah an inkap leh. KNU helte hian army outpost beiin sipai 10 an that a, hemi hnu hian sipaite hian KNU area hi an bomb zui ve leh a, an inbeihna biala cheng mi 3,000 vel chu Thailand ramah an tlanchhia a ni.
Hmar lamah pawh Pathianni khan Kachin helpawl leh Myanmar sipaite chu Hpakant-a jade-mining area-ah an inbei bawk. Kachin Independence Army (KIA) helte hian police station an bei a, sipaite hian thlawhtheihna hmangin an bei zui ve nghal a ni. He inbeihnaah hian thi an awm lo nia report a ni.
KNU leh KIA hian Myanmar mipuite sipai rorelna duh loa nawrh an huaihawt mek chu an thlawp thu an lo sawi tawh a, civil mite an beihna pawh titawp turin sipaite hian an ngen a ni. KNU chuan Myanmar sipaite chu politics-a inrawlh ve lo turin an phut a, sipai hotu lu ber general Min Aung Hlaing tana an lehkha thawn pawh tichhuakin, nawrh huaihawt vanga an mi mante chhuah vek tur te, mipuite chunga tharum thawhna an thlente tihtawp tur leh, sipaite chu politics-a inrawlh ve lo tura an phutna thute an ziak a ni.