Indonesia oil refinery-ah kangmei a chhuak

Indonesia rama oil refinery lian ber zinga pakhatah nimin zing khan kangmei nasa tak a chhuak a, mi 950 chu hmun him lamah sawnchhuah niin chin hriat lohin mi eng emaw zat an awm. 

Kangmei chhuahna hmun hi state oil firm Pertamina ta, West Java province-a Balongan refinery a ni a, kangmei chhuah dan hi hriat chian a la ni lo. Mahse kangmei a chhuah lai hian ruah nasa taka surin ṭekte pawh a tla niin Pertamina chuan a tarlang. 

Pertamina chief executive officer Nicke Widyawati chuan refinery tank-te a kang a, mahse processing plant erawh a nghawng chhe tel lo niin a sawi. 

Regional disaster management agency chuan kangmei chhuak vanga hliam, damdawi-ina enkawl zingah mi pangate chu an dinhmun a ṭha lo hle  niin a sawi. Hliam tuarte hi refinery awmna bula cheng leh, kangmei a chhuah laia a bul hnai kawnga lo awmte an ni. 

Balongan Refinery hi Indonesia rama oil refinery lian ber zinga mi niin, Jakarta khawchhak lam km 200 vela hlaa awm a ni. Ram hectare 340-a zau niin, ni khatah oil barrel 1,25,000 vel a siam chhuak a, Jakarta area-a chengten oil an hmuhna pui ber a ni.