In luah man a tihsan vangin SKorea President-in a adviser a ban

South Korea president Moon Jae-in chuan a economic policy adviser, Kim Sang-jo chu Seoul-a Gangnam district-a a in luah man a tihsan avangin nimin khan a ban. 

South Korea sorkar chuan mi in luahtute humhalhna tur, awmze nei loa inluahman tihsan vak ṭhin venna turin nikum July thla khan in luah man tihsan a nih pawhin 5% aia tihsan khapna a lo siam tawh a ni. Mahse he dan siam a ni hma ni hnihah Kim Sang-jo hian Seoul-a a apartment luah man chu 14% in a lo tisang a ni. 

Kim chuan an rama in man sang chak lutuk avanga harsatna an tawh mek laia mipuite lung tiawi lo zawnga thil a lo ti chu pawi a tih thu a sawi. Seoul bikah hian in man hi a to chak hle a, kum 2017 aiin 50% zetin a to tawh a, khawvela in man to chakna ber a ni tih statistics site Numbeo chuan a lo sawi tawh bawk. 

Kum 2017, May thla aṭang khan Kim hi President hnuaiah hian a thawk a, a tirah chuan antitrust chief niin, a hnuah chief policy advisor-ah dah a ni. Kim hi ban a nih hnuah a thlaktu atan senior economic secretary, Lee Ho-seung chu ruat nghal a nih thu President chief of staff chuan a sawi.