Britain MP-ten Brexit tihkhawtlai rawtna pawm

Britain Parliament chuan Nilaini khan European Union aṭanga Britian inlakchhuak hun tur tihkhawtlai rawtna chu an pawm.

House of Commons-a vote lakah Brexit tihkhawtlai duh lamah vote 313 tlain, a duh lo lamah vote 312 a tla thung. He bill hi Parliament upper house, House of Lords-ah an pawm ve leh a ngai dawn a, hei bakah hian Brexit tikhawtlai tur chuan European Union in a remtihpui a ngai bawk ang.

Britain Prime Minister Theresa May-i chuan Britain inlakhran hun, April 12-a pawhsei tawh chu sawn hlat belh leh turin a dil a dawn a ni.

Nilaini a vote lak hma hian PM May-i hian eptu pawl, Labour Party hruiatu Jeremy Corbyn chu kawmin Brexit deal chungchang a sawipui a, EU chhuahsanna turta inremna an siam chu MP-ten ṭum thum zet an hnawlsak tawh avangin buaina chinfel dan kawng hi zawn a ngaih thute a sawipui a ni.

European Commission President Jean-Claude Juncker chuan May-in EU hruaitute nena withdrawal agreement an lo siam tawh chu MP-te pawm tura April 12 hmaa a hmin theih chuan, Brexit deadline chu May 22 thleng pawhsei sak an ni tur thu a lo sawi tawh a ni. Mahse MP te hian an pawm thei lo a nih chuan Britain chu hun pawhsei sak a ni tawh dawn lo tih a sawi.

Parliament-a Brexit tihkhawlai rawtna pawm a nih vang hian Nilaini zan khan Junior Brexit Minister Chris Heaton-harris chu a bang. PM May-i hnena lehkha a thawnah Heaton-Harris chuan a tira inremna siam a nih ang khan March 29-a EU aṭanga inlakchhuah chu a duhdan ber a ni tih sawiin, inlakchhuah hun tur pawhsei a ni zel chu a thlawp thei tawh lo tih a hrilh. Heaton-Harris hian PM-in inremna a siamte an pawm tlan theih loh chuan inremna siam loa EU aṭanga chhuah mai duhtu a ni a, mahse PM May-i chuan inremna siam loh chuan EU chhuahsan hi a duh lo thung a ni.