Pakistan court-in President hlui Zardari hriattirna pe

Pakistan-a Islamabad High Court chuan an ram President hlui Asif Ali Zardari chu nikuma election nomination paper a thehluhah a thil neih zat thup ṭhena puh chungchangah insawifiah tura hriattirna a pe.

High Court-ah hian rorellai Pakistan Tehreek-e-Insaf (PIT) hruaitu pahnih Khurram Sher Zaman leh Usman Dar chuan Zardari lakah hian petition an thehlut a ni. An petition thehluhah hian Zardari chu nomination paper-ah a thil neih dollar maktaduai chuang hu thup ṭhenah an puh a, heng zingah hian New York-a flat a neih leh bulletproof motor a neih pawh a zep tel niin an sawi. A thil neih a zep avang hian MP a nihna aṭanga ban turin an phut a ni.

Zadari hi nikuma Pakistan ram inthlanpui neihah khan Sindh province-a NA-21 Nawabshah bial aṭangin National Assembly member atan thlan tlin a ni.

Pakistan danah chuan inthlana chuh tumte chuan nonimation paper an thehluhah an thil neih zawng zawng an tarlang tur a ni a, tarlang kim lo chu thlan tlin an nih pawhin ban theih an ni ang.

Kum 2008-2013 inkara Pakistan president lo ni tawh, Zardari chuan an puhna hi a pha thung a, rorellai party-in eptu hruaitute tihhmingchhiat an tumna hmanrua mai niin a sawi.