US House-in Yemen tualchhung indonaa US inrawlh duh lo

US House of Represen-tatives chuan Yemen tualchhung indona thleng mekah US inrawlh chhunzawm tawh lohna tur bill chu Ningani khan an pass.

Yemen tualchhung buaina thleng mekah Saudia Arabia leh UAE ṭangdun ten Yemen helpawl, Houthi laka beihpui an thlakah US hian a lo pui ṭhin a ni. Saudi Arabia kaihhruaiin Arab ṭangrual ramte chuan kum 2015 aṭang khan Yemen sorkar paihthlatu, Houthi helte hi ṭum 19,000 chuang zet an bei tawh a ni.

US chuan Houthi laka beihpui an thlaknaah Saudi Arabia leh UEA-te hi target leh intelligence information-te a lo pek ṭhin bakah, an indo thlawhtheihna tui thunna turte a lo pe bawk ṭhin a ni.

Ningai-a House-a vote lakah hian Yemen indonaa US inrawlh tir tihtawpna tur bill hi thlawptu lamah vote 247 tlain, a thlawp lo lamah vote 175 a tla thung. He bill hi US President Donald Trump-ah hnenah thawn a ni leh dawn a, mahse President chuan khap theihna thuneihna, veto a neih hmangin a lo hnawl rin a ni thung. Trump hian Saudi Arabia a thlawp thu hi alo sawi fo tawh a ni.

Saudi Arabia leh UAE-ten beihpui an thlaknaah hian civil mi tam takin an tuar tel a, damdawi-in leh tui sawngbawlna hmunte pawh an kap tel nia sawi a ni. Aid group-te chuan Yemen tualchhung indona thlengah hian civil mi 60,000 vel zet an thi tawh a, naupang 85,000 chu ei tur mumal neiloin rilṭamin an thi bawk a, mi maktaduai tel chu ṭam mai hmabakin an awm mek bawk niin an sawi.