Myanmar-ah nawrh huaihawt zinga 500 chuang thi tawh Yangon khawpuiah mipuiten 'garbage strike' an nei

Myanmar sipai rorelna duh lohna lantira nawrh huaihawt zinga mi 500 chuang chu sipaite kut tuarin an thi tawh nia report a ni a, nimin khan mipuite hian sipai duh lohna lantirna chi khat, 'garbage strike' chu Yangon khawpuiah an nei bawk.

Yangon khawpuia nawrh huai­hawtna chi khat, 'garbage strike' an neih hmang hian mipuite chuan kawngpuiah bawlhhlawh tam tham tak an paih khawm a, kawtthler pawimawh inkalpawhna tur hrang hrangah bawlhhlawh paih darh hmuh tur a awm a ni.

Civil disobedience campaign hmangin sipai rorelna duh lohna lantirna hi kawng dang dangin neih a lo ni tawh a, kar liam ta khan "silent strike' pawh an lo nei tawh bawk.

Nimina Yangon-a 'garbage strike' neih tur chungchang hi social media lamah leh Yangon khaw chhungah loudspeaker hmanga thehdarh a ni a, mipuite chu an bawlhhlawhte kawngpui pawimawh laia dahkhawm tur hian an sawm. Hetih lai hian thuneitu lam chuan kawtthlera bawlhhhlawh paihte chungah action na tak lak a nih tur thu an sawi.

Thawhṭanni khan ram chhung hmun hrang hrangah nawrh huaihawt zinga mi 14 chu sipaiten an kaphlum leh a, an zinga pariat chu Yangon-a south Dagon district-a mi an ni tih Assistance Association for Political Prisoners (AAPP) chuan a tarlang.

US-in trade deal titawp

Ram hrang hrangten Myanmar-a demo­cracy sorkar din leh turin an nawr a, hrekna pawh ram eng emaw zatin an siam tawh a ni.

Thawhṭanni khan US chuan Myanmar nena insumdawn tawnna, trade deal an siam chu titawp lailawk a ni tih sawiin, mipui sorkar din leh turin an phut. US, Canada, Britain leh European Union pawhin Myanmar sipai hotute hrekna hi an lo siam tawh bawk.

United Nations pawhin nawrh huaihawtte chunga Myanmar sipaite chet dan rawng tak chu a dem thu a lo sawi fo tawh bawk a ni.