Brazil President-in a cabinet siksawi

Covid-19 hri leng dona kawnga hma la ṭha tawk loa puha sawisel hlawh tak, Brazil president Jair Bolsonaro chuan a cabinet siksawiin cabinet minister paruk a thlak.

President-in cabinet a siksawiah hian foreign, defence leh justice minister pawh thlak tel an ni. Brazil ram hian Covid-19 hri leng thawh hnihna a tuar leh mek a, hri kai an pung chak chho lehin, an ram health service dinhmun pawh a ṭha lo hle nia sawi a ni.

An rama hripui a len tirh aṭangin hri leng chungchanga a ngaihdan avangin President Bolsonaro hian sawisel a hlawh nghal hle. President hian a tir lamah Covid-19 hri chu tlang hri leng satliah mai niin a sawi a, hri dona atana inkhuahkhirhna siamte chu duh loin, inkhuahkhirhna siamin an ram economy a nghawng chhe tur chu hri leng aiin a pawi thei zawk dawn niin a lo sawi a ni. Hri darh tur venna atana hma a lak ṭhat tawk loh avangin an ram mipui sawisel pawh a tawk nasa a, hri dona kawnga hmalak dan tura an ngaihdan a inmil theih loh avangin health minister pawh hri len hnuah ṭum li ngawt thlak an ni hman tawh bawk.

Brazil ramah hian coronavirus kai hmuh chhuah tawh hi maktaduai 12 chuang an awm tawh a, an zinga nuai thum chuangin an thihpui tawh bawk. Khawvelah US dawtah hripui vanga thi tamna ber ram a ni mek a ni.