April 9-ah Israel ram inthlanpui nei dawn Netanyahu-an West Bank settlement lak a tiam

Israel Prime Minister Benjamin Netanyahu chuan an ram inthlanpui neih tura thlan tlin a nih leh chuan West Bank-a Juda-te chenna hmun chu lak a tiam.

Israel ram inthlan hi naktuk, April 9 hian neih a ni dawn a ni.

Prime Minister leh right -wing Likud party hruaitu Netanyahu hi West Bank-a Juda-te chenna siam thlawptu lam a ni a, hetihlai hian Israel-in Palestinian ram a luahsaka Juda-te chenna hmun tur a siam hi international law chuan a pawmsak lo thung. Mahse thla hmasa khan US chuan Israel-in kum 1967-a lak leh a luah zui, Syria-a Golan Heights biala thuneituah Israel chu a pawm thu a sawi a ni.

West Bank-ah hian Juda mi 400,000 vel an cheng mek a, East Jerusalem-ah 200,000 vel an awm bawk. West Bank-a hian Palestinian mi maktaduai 2.5 vel an awm a ni. Palestinian-te chuan Israel-in an ram a luahsak, West Bank, East Jerusalem leh Gaza Strip te chu Palestinian ram hrana siam tumin an bei mek a ni.

April 9-a inthlanpui neih turah hian vote nei mi maktaduai 5.88 an awm. Israel Parliament, Knesset-a seat 120 member tur thlannaah hian party l4 in an chuh dawn a ni. Sorkar siam tur leh prime minister thlang turin party hian Knesset-a majority nei turin seat 61 an neih phak a ngai ang.

Israel ram inthlanpui neihah hian vote tla hi a ṭha tlangpui ṭhin a, inthlan hnuhnung ber kum 2015-ah khan vote tla hi 71.8% a tling pha.

PM Netanyahu hian a term li-na a hmang mek a, inthlanpuiah hian an party-in thuneihna an chan chuan PM term nga-na a chelh leh thei dawn a, Israel prime minister dinhmun chelh rei thei ber a ni ang.

Inthlanpui neih turah hian Netanyahu party, Likud party leh army chief hlui Benny Gantz kaihhruai centrist Blue and White party-te chu an inbeih tawk hle rin a ni. Israel Democracy Institute in mipuite ngaihdan a lak hnuhnung berah chuan PM atana Netanyahu duhtu hi an la tam zawk a, a bikin ṭhalai lamah a la tla na hle a ni.