US Homeland Security chief a bang US Homeland Security chief Kirstjen Nielsn chu Pathianni khan a bang

Senior official chuan President Donald Trump-an immigration policy khauh zawk siam a tum chungchangah Homeland Security chief nen hian an thu a inhmuh theih loh vangin bang turin a ngen a, President ngenna hi a pawm ta niin a sawi.

President Trump chuan Pathianni khan a twitter-ah Secretary of Homeland Security Kirstjen Nielsen-i chu a ban tur thu hi sawiin, a hna lo thawhnate lawmthu a hrilh tih a sawi. Trump chuan US Customes an Border Protection commissioner nilai, Kevin McAleenan chu acting DHS secretary a nih tur thu a sawi nghal bawk.

Trump leh Nielsen-te hian kar kalta Zirtawpni khan California-a Mexico ramri an tlawh a, hemi ṭuma thu a sawiah President chuan an rama dan loa luh tum leh inhumhimna dila luh tumte tan pawh kawng khar sak an nih tur thu sawiin, an ram chu a khat tawh tih a sawi a ni.

Kum 46 mi, Nielsen-i hi kum 2017 December thla aṭang khan DHS secretary a ni a, mahse kum 2018 December thlaa ramri-a khuahkhirhna khauh zawk kalpui vanga US-a pemluh tum chhungkaw ṭhendarh an nih phah avang khan a lungawi lo hle a, a bang dawn nia sawi thawm pawh a lo awm fo tawh a ni.

Donald Trump hian dan loa ramri kaltlanga an rama luh ṭhinte dang turin hma a la chhunzawm reng a, hetichung hian central America aṭanga kal mi eng emaw zat chu Mexico ramri kaltlang hian US-ah lut a la awm reng a ni. Border Patrol chuan March thla chhung khan Mexico ramri kaltlang hian US-ah mi 100,000 vel zet pem tuma lut an awm tih an sawi a, heng zinga a tam ber hi El Salvador, Honduras leh Guatemala ram aṭanga kal an ni. Trump chuan heng ram pathumte hnena chhawmdawlna an pek ṭhin chu tihtawpah a lo vau tawh bawk.