Israel ram inthlanpui nei

Israel ram inthlanpui chu nimin khan neih a ni a, rorellai party Likud Party-in hnehna an chang leh a nih chuan Prime Minister Benjamin Netanyahu chu a term nga-na atan prime minister a ni chhunzawm leh thei dawn a, Israel ram prime minister ni rei thei ber a ni bawk ang.

An ram huna zing dar 7 aṭangin vote thlak ṭan a ni, zan dar 10 thleng vote an thlak a ni. Vote nei mi maktaduai 6.34 an awm a, vote thlakna tur polling station hi 10,720 siam a ni. Israel Parliament, Knesset member 120 thlannaah hian party 40 chuangin an chuh a ni.

Inthlan hmaa Israel channel 2-in mipui ngaihdan a lakah prime minister atana Netanyahu duhtu an tam ber a, 37% in an duh laiin eptu ṭangrual pawl hruaitu, sipai hotu hlui Benny Gantz duhtu 35% an awm bawk. Inthlanpui neih turah hian party hrang hrangte chuan security, corruption leh economy te chu auhla berah an nei a ni. Mipuite pawhin security chungchang chu an dah pawimawh ber tih opinion poll lakah an sawi bawk.