Hong Kong-a demo-cracy thlawptu activist pakua thiam loh chantir

Hong Kong-a inthlanna zalen tak neih phuta nawrh huaihawttu zinga mi pakua chu vantlang tana harsatna siama puhin thiam loh chantir an ni.

Thiam loh chantir zinga mi pathumte chu activist lar tak, kum 2014-a Hong Kong-a pro-democracy movement, 'Umberalla movement' tia sawia an hotu, sociology professor Chan Kin-man, 59, law professor Benny Tai, 54, leh Baptist minister Chu Yiu-ming, 74 te an ni. Hremna tihchhuah la ni lo mah se, kum sarih thleng lung-in tantir theih an ni ang.

China rorelna hnuaia awm, Hong Kong inthlanah hian China-in a pawmpui candidate-te chauh inthlan chuh phalsak an nih vangin lungawi loin nawrh hi huaihawt a ni. Nawrh huaihawtte hian democracy kalphung anga zalen taka inthlan phutin hun rei tak chhung Hong Kong khawpui laili laiah nawrh an huaihawt a, police-ten pungkhawmte hnawhdarh nana tear gas an phuh ṭhin laka invenna tan nihliap te an hman avangin 'Umbrella Movement' tia sawi a ni zui a ni. Nawrh huaihawtte hian kum 1997-a Britain-in China kuta Hong Kong a hlan ṭuma China in a intiamna hrang hrang, Hong Kong tana thuneihna sang zawk pek a tiamte chu tihlawhtling loah an puh a ni.