US-in Saudi mi 16-te an rama luh khap

US State Department chuan Saudi journalist Jamal Khashoggi thahnaa inhnamhnawihna neia puh Saudi mi 16-te chu an rama luh a khap.

State deparment thuchhuah chuah heng mi 16-te hi Department of State, Foreign Operations, and Related Programs Appropriations Act of 2019-a Section 7031(c) hnuaiah an rama luh khap a nih thu a sawi.

Hemi hma hian Saudi official 20 chuangte visa chu a lo tihtawp sak tawh a, mi 17-te thil neih pawh khawih chet theih lohin a hreksak tawh bawk.

Saudi sorkar sawiselna thu ziak ṭhin, Khashoggi hi nikum October 2 khan Istanbul-a Saudi consulate-ah Saudi Arabia agent-ten an that a, tun thlengin a ruang hi hmuh a la ni lo. He tualthahna thlengah hian Saudia sorkar chuan dem a hlawh hle a, mahse inhnamhnawihna a nei lo niin a sawi. Tualthahnaa inhnamhnawiha puh mi 11-te chu thubuai a siamsak a, mahse tun thlengin an thubuai hi ngaihtuah mumal a la ni lo.