US-in embassy staff-te Myanmar chhuahsan turin hriattir
Myanmar ram tualchhung buainain zual lam a pan zel a, sipai rorelna duh lohna lantira mipuiten khawpui hrang hranga nawrh an huaihawt chhunzawm reng bakah, border area-ah sipai leh helpawlte an inkap bawk. Hei vang hian US chuan a embassy-a non-essential staff leh an chhungte chu Myanmar ram chhuahsan turin a hriattir.
Nawrh huaihawtte laka sipaite an che rawng telh telh nia sawi a ni a, Assistance Assocation for Political Prisoners (AAPP) chuan February 1-a civil sorkar paihthlak a nih aṭanga mipuite lungawi lohna an lantirnaah civil mi 521 an thi tawh niin a sawi. Heng zinga mi 141 chu kar liam ta Inrinnia sipaiten an kahhlumte an ni.
Thawhlehni khan sipaite kut tuarin nawrh hauihawt zingah mi pariat an thih belh leh tih advocacy group chuan a sawi a, nimin zing vartianah khan mi pakhat kahhlum ani leh bawk.
Khawpui hrang hrangah nawrh huaihawt chhunzawm reng a ni a, hetih lai hian border area-ah sipaite leh helpawlte inbeihna a thleng leh bawk. Hei vang hian ramri kaltlanga ram danga himna zawnga tlanchhia pawh an pung chak hle nia sawi a ni.
US state deparment chuan Myanmar mipuiten sipai rorelna duh lohna lantira nawrh an huaihawt chu an la kalpui chhunzawm zel dawn nia a lan thu sawiin, sipaite chuan nawrh huaihawt zinga mi eng emaw zat an man tawh thu pawh a sawi bawk.
US hian Myanmar-a civil sorkar hnena thuneihna pek a nih leh hma chuan ram pahnihten insumdawn tawnna atana inremna an lo siam tawhte tihtawp lailawk vek a nih thu a lo puang tawh a ni.
UNSC-in meeting nei
Myanmar ram chungchang ngaihtuahin nimin khan United Nations Security Council chuan closed door meeting a nei.
UN secretary-general Antonio Guterres thupuangtu Stephane Dujarric chuan Security Council member-te hian lungrual takin Myanmar sipai chet dan demna na tak an siam ngei an beisei tih a sawi. Sipaite chu civil mite chunga an chet dan titawp a, tharum thawhna bansan a, an mi mante chhuah leh, Myanmar chu mipuite kuta pe kir leh tura an phutna chu an siam ngei a beisei thu a sawi.