WHO team hnenah China-in raw data a pe duh lo

World Health Organisation (WHO) director-general Tedros Adhanom Ghebreyesus chuan China rama zin a, Covid-19 hri lo chhuah dan chhuitu WHO team hnenah China chuan Covid-19 kai hmasa data chu a pe duh lo niin a sawi.

WHO team hi Covid-19 hri lo chhuah ṭanna nia sawi, China-a Wuhan khawpuiah hri chungchang zirchiang turin January leh February thla khan kar li chhung zet an awm a ni.

Wuhan-ah hian WHO team hi China scientist-te nen thawk hoin, an thil zirchianna final report hi Thawhlehni khan an tichhuak. Zirchianna an neih lai hian team investigator zinga pakhat chuan China-in Covid-19 case hmasa raw data an pek duh loh thu leh, hei hian hri lo chhuah dan zirchianna an neihah pawh harsatna a siamsak theih thu a lo sawi tawh a ni.

WHO team report chuan Wuhan laboratory aṭanga Covid-19 hi lo chhuak nia sawi awm chu thil ni thei lo nia a lan thu an sawi a, hemi rual hian hri lo chhuah ṭan dan zirchianna nasa zawk neih a, China ramah pawh mission tam zawk neih a la ngai dawn niin Tedros chuan a sawi.

Team leader, Peter Ben Embmarek chuan virus hi kum 2019 October/November vel khan Wuhan-ah hian a lo darh ṭan nia a lan thu a sawi a, mahse area hrang hrang aṭanga data tam tak lakkhawm an ngaih laiin, hmun ṭhenkhatah raw data an hmuh theih loh thu a sawi. Zirchianna thawh hnihna la neih leh ngei a ngai a ni, a ti.