Air pollution vangin Nepal ramah school khar

Nepal sorkar chuan an rama boruak bawlhhlawh, air pollution a nasat avangin zirna inte ni li chhung atan a khar tir a, zirlai nuai tel chu school kal loin an awm a ngaih phah a ni.

Mi maktaduai 30 chuang chenna, Nepal hi khawvela boruak tibawlhhlawh nasa ram pahnih, China leh India ram inkarah a awm a ni.

Kar liam ta kartawp khan air pollution level hi an ram khawpui, Kathmandu-ah phei chuan a sang hle tih sawiin, kum 2016-a pollution level an chhinchhiah ṭan aṭanga a san ber ṭum a thleng tih sorkar official Shankar Paudel chuan a sawi. Sorkarin PM2.5 standard level atana a bithliah chu 40 micrograms per cubic metre a nih laiin Pathianni khan Kathmandu boruak chu 214 micrograms per cubic metre a thleng a, hei hi mihring hriselna atan pawh a hlauhawm pha a ni.

Education ministry thupuangtu, Deepak Sharma chuan school khar hian zirlai naupang maktaduai riat vel a nghawng tih a sawi. Health ministry chuan air pollution a nasat avangin Kathmandu khawpuia chengte chu inchhunga tawm turin a ngen a, emergency thil a nih loh chuan pawn chhuak lo turin a ti.