Israel inthlanah party mala sorkarna siam thei awm lo

Pathianni a Israel Parliament inthlan result chu hriat kim thawkhat a ni tawh a, party mala sorkarna siam thei an awm lo. Hetihlai hian Prime Minister Benjamin Netanyahu chu a term nga-na atana PM dinhmun chelh leh thei turin a dinhmun a ṭha hle nia ngaih a ni.

Prime Minister Benjamin Netanyahu-a kaihhruai, rorellai Likud Party leh sipai hotu hlui, Benny Gantz-a kaihhruai Blue and White ṭangrual pawl chuan seat 120 awmna, Knesett-ah seat 35 ve ve a an la a ni. Netanyahu leh Gantz-te hian hnehna an chang niin an insawi ve ve bawk.

Party mala sorkar siam thei an awm theih dawn loh vangin Netanyahu hi amah thlawptu right-wing party dangte nena ṭangrual sorkar siam turin an dinhmun a ṭha zawk a ni. Inthlan result kimchang hi Zirtawpniah tihchhuah a ni ang.

Kum 69 mi, Netanyahu hian ṭangrual sorkar a siam leh thei a nih chuan kum 71 chhunga Israel rama prime minister ni rei thei ber a ni dawn a ni. Ṭangrual sorkar siam tum hian an thawhpui party dangte nen an inbe mek a ni.

Inthlan dawna campaign laiin Netanyahu leh Gantz hi an inbei na hle a, eiruk, midangte ngaihdan ngai pawimawh tawk lo leh security lama nem lutukah an inpuh tawn a ni. Party lian pahnihten a mala sorkarna an siam theih tak loh vangin ṭangrual sorkar dinna turah party tenau zawkte an pawimawh dawn a, chanvo pawimawhte pek ngei an phut rin a ni.