Chhawmdawlna dawng turin Venezuela inpeih : President Maduro

Venezuela President Nicolas Maduro chuan an ram khawpui, Caracas-a Red Cross chief nena meeting an neih hnuah ramdangte hnen aṭanga chhawmdawlna dawng turin an inpeih tih a sawi.

International Committee of the Red Cross (ICRC) team te chuan an president Peter Mauer kaihhruaiin kar kalta Inrinni khan Venezuela hi an tlawh a, nimin thleng khan an cham a ni. Venezuela tualchhung politics buaina thleng mek te, mipuite harsatna tawh mek chungchangte chu ngaihven a ngai hle tih an sawi a ni.

Kumin January thlaa Venezuela eptu hruaitu Juan Guaido-an acting president-a a inpuan aṭang khan Venezuala tualchhung politics hi a buai chho hle. US leh khawthlang ram eng emaw zatin Guaido hi a Venezuela ram hruaituah an pawm a, hei vang hian President Maduro chuan US nena an inzawmna pawh a lo titawp tawh a ni.

Venezuela-in crude oil a thawnchhuah zat a tlakhniam leh, ramdangten an hrek belh zel avangin Venezuela economy dinhmun pawh a nghawng hle. Mipuiten ei leh bar lam thlengin harsatna an tawk a, nitin khawsak pawh a harsat phah hle bawk. United Nations chuan Venezuela ram mipui maktaduai 30 zinga hmun thuma ṭhena hmun khat dawn chu ṭanpui ngaiin an awm niin a sawi.