Arakan Army-ten Myanmar sipai 20 kaphlum

Myanmar khawthlang lam, Rakhine state-a Myanmar sipaite nena an inbeihnaah kar kalta chhung khan sipai 20 an kaphlum niin helpawl, Arakan Army chuan an sawi a, a zingah hian army officer pawh a tel nia sawi a ni.

AA thupuangtu Khine Thukha chuan April 5 zinga Wat Nat Yone khaw bula AA leh Light Infantry Battalion No. 373 te inkahna thlengah sipai 20 hi kahhlum an nih thu a sawi. AA chuan sipaite kut aṭang hian ralthuam, pistol leh thildangte pawh an laksak niin an sawi bawk.

Myanmar sipaite chuan hel nena an inbeihnaa sipai thi leh hliam awm chungchang hi a sawilang ve ngai meuh lo a, mahse Brigadier General Zaw Min Tun chuan April 5-a inbeihna thlengah hian officer pakat leh sipai eng emaw zat an thih thu a sawi a ni.

Hetihlai hian Myanmar military leh sorkar hnuaia media lamte chuan April 5 zinga inbeihna thleng hi official-in engmah an sawilang lo.

Kumin January thla tir aṭanga AA leh Myanmar sipaite inbeihna thleng vang hian civil mi 100 chuangin an thih phah tawh a, mi 30,000 chuang chu himna zawngin an tlanchhe tawh bawk.