Venezuela president atan Guaido pawm turin UN ngen

United States Vice President Mike Pence chuan United Nations (UN) hnenah Venezuela eptu hruaitu, acting president-a inpuang Juan Guaido chu Venezuela ram hruaitu dik taka pawm turin a ngen.

Mike Pence chuan UN Security Council hnenah UN chuan interim president Juan Guaido chu Venezuela president dik taka a pawm a, Council-ah pawh a aiawh a teltir a hun tawh tih a sawi. A thil phut chungchangah hian resolution pawh a duang mek tih a sawi bawk a, mahse Security Council leh General Assembly-a resolution a pharh hun tur erawh a sawi lang lo.

Pence chuan Venezuela ram chhawmdawlna turin US sorkar chuan dollar maktaduai 60 a pek tur thu a sawi bawk.

Ram 50 chuang chuan Guaido hi Venezuela ram president atana an pawm thu an sawi tawh a, Thawhlehni khan Organisation of American States (OAS) chuan Guaido-a aiawh chu an pawla Venezuela ram aiawh atana an pawm thu a sawi.

Hetihlai hian Venezuela president Juan Guaido leh US chuan a kaihhruai sorkar chu paihthlak tumin hma an la niin a puh thung a, UN-a US in resolution putluh a tum pawh pass turin thlawptu a ngah tawk dawn lo niin a sawi a ni. Maduro hi Cuba, Russia, Turkey leh China chuan an thlawp thung.

Venezuela-ah hian hun rei tak chhung tualchhung politics buaina thleng vangin mipuiten harsatna an tawk nasa hle a, UN chuan Venezuela mipui zinga maktaduai 2.8 vel chu chhawmdawl ngaiin an awm mek niin a sawi. Ei leh in bakah damdawi lama in enkawlna lam thlengin harsatna an tawk a, cancer, diabetes leh HIV veite enkawlna tur damdawi duh khawp hmuh tur a awm lo tih a sawi bawk.