Africa rama cyclone tleh vanga thi 1,000 tling

Africa ram pathum - Mozambique, Zimbabwe leh Malawi rama thla hmasaa cyclone Idai tleh vanga thi chu mi 1,000 an tling.

United Nations chuan March thlaa cyclone Idai tleh chu southern hemisphere-a thlipui tleh na ber zinga mi leh, chhiatna thlen nasa ber zinga mi a nih thu a sawi.

Thlipui tleh vang hian Mozambique-ah mi 602 an thi a, Zimbabwe-ah mi 344 leh Malawi-ah mi 59 an thi a ni. Chin hriat lohin mi 257 an awm mek bawk.

Thli tleh hian ruah a ken tel avangin hmun tam takah tui a lian bawk a, tuilian vang hian Mozambique-ah tui hri a leng zui a, mi 4,000 chuangin an vei a ni.

Mozambique ramah chuan thlipui tleh hi mi maktaduai 1.85 velin an tuar a, UN chuan thlipui tuartute ṭanpuina turin hian thla thum chhungin emergency fund dollar maktaduai 282 mamawh a nih thu a tarlang. Mozambique ram tan hian cholera vaccine dose 745,000 chuang sem a nih tawh bawk.