Netanyahu-an sorkar thar siam dan ngaihtuah mek

Israel ram Parliament inthlan neih zawh takah rorellai, Prime Minister Benjamin Netanyahu-a kaihhruai Likud Party chu party mala seat la hnem ber niin, Knesset-a seat 120 awmah seat 36 a la. Likud party kaihhruai ṭangrual sorkar thar a din leh ngei rin a ni.

Sipai hotu hlui, Benny Gantz-a kaihhruai Blue and White alliance chuan seat 35 a la a, Gantz chuan nimin khan an chak loh chu a pawm thu sawiin, ram mipuite duhthlanna chu an pawm tih a sawi.

Netanyahu chuan right-wing ṭangrual sorkar siam turin party dangte a be kual nghal a ni. Ṭangrual sorkar hi an siam leh thei a nih chuan Netanyahu hi a term nga-na atan prime minister a nih leh thei dawn a, Israel ram prime minister dinhmun chelh rei thei ber a ni ang.

Ṭangrual sorkar siam turah hian sakhaw party pahnih - Sahas leh UTJ te an tel dawn a, heng party pahnihte hi ultra-Orthodox party an ni. Anni bakah hian right-wing party pathum - Kulanu, Yisrael Beiteinu leh Union of Right Wing Parties te an tel dawn bawk a, hengte nen hian Likuk party kaihhruai ṭangrual sorkar hian seat 65 a nei thei dawn a ni.

Kum 2015 inthlanpui neihah hian Netanyahu-a kaihhruai ṭangrual pawl chuan seat 61 neiin sorkar an siam a, a hnuah Avigdor Liberman-a party Yisrael Beiteinu party chuan ṭangrual sorkar hi zawmin an seat neih zat hi 66-ah a pung chho a ni.

President Reuven Rivlin chuan sorkar thar siam tur hi political party hrang hrang hotute a kawmkual hnuah a sawm dawn a, kar khat chhungin sorkar thar siam tur hi a koh hman beisei a ni.