Ukraine-in anti-corruption court din

Ukraine President Petro Poroshenko chuan eiruk thubuai chhuitu tur bik, anti-corruption court din a nih thu a puang.

Anti-corruption court hi Ukraine-in International Monetary Fund (IMF) loan a puk, dollar tluklehdingawn 3.9 aṭangin a din dawn a, an rama eirukna umbona kawnga hmalakna pakhat atana tih a ni.

Poroshenko chuan anti-corruption court-a judge turte thlan chhuah hna hi thla sarih chhung zet ngaihtuah a nih thu a sawi.

Court hi thuneihna hran pek niin judge 38 an awm dawn a ni.

Hetihlai hian Ukraine president thlan thawh hnihna chu April 21 hian neih a ni dawn. Inthlan thawh khatna neihnaah president atana tling tura vote hmuh ngai zat hmu pha an awm loh avangin candidate zinga vote hmu sang pahnihten inthlan thawh hnihna hi an hmachhawn leh ang.

March 31-a inthlan thawh khatna neihah khan Poroshenko hian vote 16% a chauh a hmu pha a, a khingpui comedian Volodymyr Zelensky chuan 30% chuang a hmu thung.

Ningani-a mipui ngaihdan lakah Poroshenko hian Zelensky hi a pha lo hle a, president atana Poroshenko duhtu hi 21% an nih laiin Zelensky duhtu hi 61% an tling thung a ni.