Suu Kyi-i thubuai dang siam sak leh

Myanmar sipaite chuan an ram hruaitu an paihthlak, Aung San Suu Kyi chu official secrets law bawhchhiaah puhin thubuai dang an siam sak leh a, he thubuaiah hian thiam loh chantir a nih chuan kum 14 thleng lungin tantir theih a ni ang.

February 1-a sipaiten civil sorkar thuneihna an hnehchhuh hnuah Suu Kyi leh National League for Democracy (NLD) hruaitu dang eng emaw zat an hreng zui a ni. Suu Kyi hi dan loa ram dang aṭanga walkie-talkie radio paruk la lut leh, coronavirus protocol bawhchhiaah puhin thubuai siamsak a ni a, a hnuah thubuai dang siamsak belh zel a ni bawk.

Suu Kyi-i chief lawyer, Khin Maung Zaw chuan Suu Kyi bakah a cabinet minister pathum leh economic adviser Sean Turnell-te chu kar liam tak khan Yangon court-ah official secrets law hnuaiah thubuai hi siamsak an ni a, mahse Nilaini khan hemi chungchang hi a hre ve chauh tih a sawi. He thubuaiah hian Suu Kyi leh a thawhpuite hi thiam loh chantir an nih chuan kum 14 thleng tan tir theih an ni dawn a ni.

Myanmar ram khawpui hrang hrangah sipai rorelna duh lohna nawrh huaihawt chu chhun­zawm reng a la ni a, nawrh huaihawt zinga mi 536 chu sipaite silai hmehpuahah an thi tawh nia sawi a ni. Hetih lai hian border area-ah sipai leh helpawl pawh an la inbei chhunzawm zel.

Myanmar rama helpawl chak ber zinga mi, Kachin Independence Army (KIA) leh sipaite, an ram hmarlam border area-a inbeihnaah sipai 20 an thi a, sipai motor pali tihchhiah a ni bawk.

Sipai sorkar siam Constitution hal

Nawrh huaihawtte chuan sipai rorelna duh lohna lantirin, sipai sorkar hnuaia an ram Constitution an lo siam tawh chu an hal.

Sipaiten Parliament an ṭhiah taka member-te chuan an ramah democracy sorkar din leh ngei tura beih an tum thu an sawi. Committee for Representing Pyidaungsu Hluttaw (CRPH) chuan kum 2008-a sipaiten Constitution an siam chu an hnawl tih an puang. Sipaiten an duan, an ram danpuiah hian civil sorkar a din pawhin sipaite hnena thuneihna eng emaw zat pekna tur an siam tel a ni.

CRPH international envoy chuan he constitution hi hnawl a nih thu sawiin, an ram tan ni thar a ni ṭan tih a sawi.