France ram pumah lockdown puang leh

France president Emmanuel Macron chuan an rama Covid-19 hri leng hluar chho leh mek avangin a ṭum thumna atan vawiin tlai aṭangin ram pumah inkharkhipna, lockdown kalpui leh a ni dawn tih a sawi.

Vawiin aṭang hian school-te chu kar thum chhung atan khar an ni leh vek dawn a, dawr pawh hemi chhung hian khar an ni ang. Zin veivah chungchangah khuahkhirhna siam a ni leh dawn bawk.

Nilainia TV-a thu a sawiah, President Macron chuan lockdown kalpui chhung hian mahni in aṭanga km 10 aia hlaa kal chhuah khap a ni dawn a, km 10 aia hla kal chhuah ngaite tan phalna an lak a ngai dawn tih a sawi. Zan dar 7 aṭanga a tuk zing dar 6 thleng curfew puan a ni ziah bawk ang.

President chuan hri leng thawh thumna an tuar leh mek tih sawiin, hma an lak thuai loh chuan thunun theih lohin a awm dawn tih a sawi. France ramah hian Covid-19 thihpui hi nuai khat dawn an tling tawh a, hri kai ICU-a enkawl mek hi 5,000 chuang an awm bawk.

Macron chuan Covid-19 vaccine pek hna pawh chak zawka kalpui a tiam a, April thla laihawl-ah chuan kum 60 chunglam chu vaccine hi pek hman vek tum a nih thu leh, May thla laihawlah kum 50 chunglam pek hman vek tum a ni tih a sawi.