NKorea hotuin US nena summit neih leh hreh lo

North Korea ram hotu, Kim Jong-un chuan US chuan kalphung thar nena inbiakna dawhkan a kil thei a nih dawn chuan US President Donald Trump nena summit neih leh chu a hreh lo tih a sawi.

Kumin February thla khan Kim leh Trump-te hian a ṭum hnihna atan Vietnam khawpui, Hanoi-ah summit an lo nei tawh a, mahse hemi ṭum hian inremna engmah siam thei loin meeting hi an titawp a ni.

Kim chuan Supreme People's Assembly-a thu a sawinaah, inbiakna nei dun leh tur chuan US-in tuna a kalphung hman mekte chu a thlak a ngai a ni, a ti. Tuna a kaldan ang reng chuan eng anga nasa pawhin nawr mah se, NKorea chu a nawr che dawn lo a, vawi tam inbiakna nei pawh nise hlawkna engmah a awm dawn lo a ni, a ti.

Kim chuan meeting neih tur chungchangah thutlukna pawimawh tak siam turin kumin kum tawp thleng US chu a nghak dawn tih a sawi.

US President Trump chuan Hanoi-a an inbiakna a hlawhchham chhanah NKorea-in an ram hrekna hlip vek tura a nawr hmasak vang niin a sawi a, mahse NKorea chuan hei hi thu dik lo a nih thu leh, an ram hrekna ṭhenkhat chu thlah dul deuh tura an tih chauh thu a sawi thung.

Trump nen chuan inpawhna ṭha nei mah se, summit vawi thumna nei tur chuan an inkar buaina chinfelna tur rawtna ṭha tak a neih ngei a ngai tawh ang, tiin Kim chuan a sawi. Inbiakna hmanga kan inkara inhriatthiam lohna awmte chinfel dan chu rawt reng mah se, kan ram an hrekna erawh an belhchhah zel thung a ni, tiin a sawi. US-in an ram a hrekna leh nawrna policy a kalpui mek chu thil atthlak leh hlauhawm tak, tel hmanga meialh ṭhelhmih tumna ang vel a ni, a ti.