Iran tuilianin dollar tld 2 hu thil tichhia

Iran rama tuilian vanga thi chu mi 76 an tling tawh a, tuilianin thil a tihchhiat hlut zawng hi dollar tluklehdingawn 2.2 hu vel a ni tawh a ni. Ramchhung hmun ṭhenkhat chu tui a len leh mai hlauhthawnawmin a la awm mek bawk.

March 19 aṭang khan ruahsur nasa vangin hmun tam takah tui a lian a, hmarchhak lam bial chuan tuilian hi an tuar hmasa a, a hnuah chhim thlang lam province-ah a lian zui ve leh a ni. Official-te chuan kar kalta Inrinni aṭang khan ruah nasa taka a sur leh avangin an ram khawchhak lam bialah tui a len leh mai a hlauhawm nia sawiin, warning pawh an tichhuak tawh a ni.

Iran rama province 31 zinga 25-in tuilian hi an tuar a, mi tam tak hmun him lamah sawnchhuah niin, tuilian hian in tam tak a tihchhiat bakah, thlai chinna ramte a chim nasa hle bawk.

Transport Minister Mohammed Eslami chuan tuilian hian lei (bridge) 725 zet a lenchhia a, kawng km 14,000 chuang a tichhe tel bawk niin a sawi. Hei vang hian inkalpawhna lam thlengin a nghawng buai hle.

Tuilian tuarte chhawmdawlna kawngah ram hrang hrangin Iran hi an pui a, France chuan puan-in 201 leh pump 114 a thawn lut tawh. World Health Organization leh UNICEF bakah Germany, Iraq, Kuwait, Oman, Pakistan, Russia leh Turkey te pawhin ṭanpuina hi an pe tawh a ni. Mahse chhawmdawl hna thawktute chuan US-in Iran hrekna a kalpui avangin harsatna tawkte ṭanpuina hna pawh an duh angin an kalpui thei lo niin an sawi.