American Airlines-in nitin flight 115 cancel dawn

American Airlines chuan Boeing 737 MAX thlawhtheihna te chu August 19 thleng dintir an nih dawn avangin nitin flight 115 a cancel phah a ngai dawn.

March 10-a Ethiopian Airlines 737 MAX thlawhtheihna tlaa mi 157-in nunna an chan hnuah ram leh airlines eng emaw zat chuan he thlawhtheihna hi an dintir nghal a, a him tawk leh tawk loh ennawn leh an phut a ni. American Airlines pawhin he chhiatna thleng vang hian 737 MAX hi June 5 thleng dintir turin a ti a, a hnuah August 19 thlengin a pawtsei leh a ni.

American Airlines chairman leh CEO Doug Parker chuan MAX aircraft dintir an nih avanga nitina flight an cancel tur hi nikhata flight an neih aṭanga 1.5% a tling niin a sawi. Hemi rual hian aircraft hi hman chhunzawm tura phalna pek leh thuai a nih pawh a rin thu a sawi bawk.