Israel palaiten Bahrain zin tum ṭhulh

Israel palai, sumdawng aiawh leh sorkar official-te chuan Bahrain-a conference tel an tum chu secuirty thil avangin an ṭhulh.

Nimina Bahrain-a Global Entrepreneurship Network buatsaih conference-ah hian Israel palaite hian tel an tum thu an lo tichiang tawh a, mahse Pathianni khan Bahrain parliament chuan Israel aiawhte tel tum hi an remtih loh thu thuchhuah a siam a, hei bakah hian an khawpui Manama-ah mi eng emaw zatin duh lohna an lantir bawk. Hei vang hian Israel palaite chuan an ṭhulh ta a ni.

Organisation president Jonathan Ortmans chuan Israel palaite chu an lo dawn sawn theih reng thu an hrilh a, mahse anmahni zawk hian security lam venthawn avangin kal loh mai an duh a, midang tana harsatna thlen an duh loh thu an sawi a ni, a ti. He conference-ah hian ram 180 vel aṭangin palai an tel a ni.