Assange-a'n embassy-ah 'spy centre' a din - Ecuador President

Ecuador President Lenin Moreno chuan London-a an ram embassy-a WikiLeaks co-founder Julian Assange-a humhimna an pek an tihtawp thut avanga man a nih phah chungchang chu sawifiahin, Assange hian Ecuador embassy chhungah hian midangte enthlakna tur, spy centre din a tum vang a ni, a ti.

President Moreno chuan, '' Kan in, midangte tana rilru zau taka kan hawn hi in enthlakna hmuna siam kan remti lo" a ti. Thutlukna a siam chu a mimal ngaihdana siam ni loin, international law behchhana siam a nih thu a sawi bawk.

Julian Assange hi Ecuador embassy aṭanga British police-te'n an man hnuah Westminster Magistrate Cout-ah hruai a ni. WikiLeaks hian US document pawimawh tak tak a tihchhuah sak avangin Assange hian US-ah thubuai a nei mek bawk a, US thuneitute chuan a thubuai hmachhawn tur hian an rama thawn turin an ngen a ni.