Paris-a Notre-Dame cathedral a kang France President-in din thar a tiam

France ram khawpui, Paris-a cathedral hmingthang, kum 850-a upa Notre-Dame Cathedral-ah an ram huna Thawhṭanni zan khan kangmei a chhuak a, Gothic buil­ding-a inchung chhip zum chu kang chhiain inchung hi a chim a, a structure pui ber erawh an veng him hman a ni.

Kangmei chhuak hi kangṭhelhtu 500 ten an ṭhelh nghal a, darkar kua hnuah an ṭhelh mit thei a ni.

Official-te chuan kangmei chhuah chhan tak hi hriatchian a ni lo tih an sawi a, mahse building chei ṭhat hna thawh mek a nih avangin hemi kaihhnawih te pawh hi a ni thei tho tih an sawi. Paris prosecutor office chuan he chhiatna thlen chhan hi an chhui zui nghal tih an sawi. Kangmei chhuak ṭhelhnaah hian kangṭhelhtu pakhat chuan hliam na tak a tuar.

France President Emmanuel Macron chuan Thawhṭanni zan vek khan kangmei chhuahna hmun hi a tlawh nghal a, cathedral main structure ber ven hman a nih avangin chhiatna nasa zawk thleng tur chu an veng thei tih a sawi.

Emergency team chuan cathe­dral-a sakhaw thil pawimawh leh hlu tak tak chu an hum hman a, heng zingah hian Isua Krista khenbeh a nih hmaa hlinglukhum an khumtir nia an sawi pawh a tel. Hei bakah hian he hlinglukhum Paris-a a lak ṭuma King Louis IX-a puan bah te pawh an hum hman bawk.

President Macron chuan cathedral chu a vaiin din thar leh a ni dawn tih a sawi a, he hmun hi France tana hmun hming­thang leh pawimawh tak a ni tih sawiin, a din thar lehna atan hian project pawh an siam dawn tih a sawi a ni. Hemi rual hian cathedral din tharna tur atan hian international fundraising scheme siam a tiam nghal bawk.

Billionaire François-Henri Pinault, Kering group chairman leh CEO, Gucci leh Yves Saint Laurent fashion brand neitu chuan Notre-Dame din thar lehna tur atan hian US dollar maktaduai 113 pek a tiam nghal. French cha­rity, Foundation du Patrimoine pawhin UNESCO Heristage site siamṭhatna tur atan hian ṭanpuina an dil nghal bawk a ni.

Mi hrang hrangin Notre-Dame kang chu pawi an tih thu leh, France ram an tuarpui thu an sawi. Vatican chuan he chhiatna thleng hian a ṭhawn thu leh pawi a tih thu a sawi a, UK Prime Minister Theresa May-i pawhin chhiatna rapthlak tak a ni, a ti. UNESCO pawhin kumtina mi maktaduai 13 velin an tlawh ṭhin, he hmun hmingthang tak din thar a nih leh theih nan France chu a thlawp zel dawn tih a sawi bawk. Germany Chancellor Angela Merkel chuan Notre-Dame chu 'France leh European culture symbol a ni', a ti. US President Donald Trump pawhin cathedral hmingthang tak kang lai hmuh chu thil hrehawm tak a nih thu a sawi.