Pulitzer Prize dawngtu zingah jail tang mek Myanmar journalist tel

Journalism lama chawimawina ngaihhlut tak, Pulitzer Prize chu Reuters in a dawng a, Reu­­ters staff zingah hian Myanmar journalist pa­hnih, sorkar thuruk puang­zar nia puha Yangon jail-a tang mekte an tel.

Reuters hian Pulitzer Prize pahnih - Buddhist mite leh Myanmar sipai­ten Rohingya Muslim mi 10 an thah dan chung­chang an chhui chianna, investigative report a siam leh US ramria pemluh tumte thlalak an tihchhuah hmangin an la a ni.

Pulitzers hi kum 1917 aṭang khan pek chhuah a ni a, board member 18 awmin an zingah hian a hmaa chawimawina lo dawng tawh bakah, journalist leh academics hriat hlawh tak takte an tel. Reuters leh Asso­ciated Press chu interna­tional reporting-ah chawi­mawina hi hlan an ni.

Reuters hian Myan­mar-a Rakhine state-a Inn Din khua Buddhist mite leh Myanmar sipaiten Rohingya Muslim 10 an thah dan chungchang an report a, he report ziaktu Wa Lone leh Kyaaw Soe Oo te chuan mi 10 te phumna thlan an hmuh aṭangin an chhui zui a ni. Report an zawh fel hma, kum 2017 December thla khan sorkar document pawimawh puangzara puhin man an ni a, kum sarih tang turin hrem an ni. Hemi hnu hian an thawhpui Simon Lewis leh Antoni Slodkowski te chuan an report hi zawhsakin, 'Masscre in Myanmar' tiin nikum February thla khan an tichhuak a ni.

News photograpy cate­gory-a Reuters in chawi­mawina dang an hmuhna thlalak chu 'On the Migrant Trail to America' tih niin, Central America aṭanga US-a pem luh tum, US ramria an awm lai thlalak a ni.