US-in Pakistan-a zin turte fimkhur turin chah

US sorkar chuan an ram mi, Pakistan-a zin tumte chu inngaihtuah ṭha leh turin a ti a, an zin a nih pawhin Balochistan, Khyber Pakhtunkhwa leh Pakistan occupied Kashmir (PoK) te chu firfiakte pawikhawihna thlen hlauhawm zualna hmun a nih avangin tlawh lo turin a chah.

US-in travel advisory a tihchhuah tharah Pakistan ram pum chu 'Level Three' category-ah a dah a, hetihlai hian Pakistan ramchhung hmun ṭhenkhat chu 'Level Four' category-ah a dah thung a, heng hmunte hi tlawh lo turin US citizen te chu a ngen a ni.

State department chuan 'Level Four' cate­gory-a an dahte chu fir­fiakten engmah sawi lawk loa pawikhawihna an thlen fona hmun te a nih thu sawiin, bazar, shopping mall, sipai hmun, airport, university, tourist location, school, hospital, sakhaw hmun leh sorkar hmun pawimawhte pawh an bei fo tih a sawi. Firfiakte hian US palaite leh US hmun pawimawhte pawh an lo bei tawh a, an la beih chhunzawm fo rin a nih thu a sawi bawk.