Italy-ah Coronavirus vangin mi mtd 16 khuahkhirh
Italy rama coronavirus, Covid-19 hri a darh belh zel avangin, kar kal ta Inrinni aṭang khan central leh northern province 14-a cheng, mi maktaduai 16-te chu khuahkhirh an ni.
Sorkarin an khuahkhirh bial chhunga cheng, mi maktaduai 16-te hi Italy mipui zawng zawng hmun lia ṭhena hmun khat an tling pha a ni. Lombardy leh heng province 14-a te chengte chuan an zin chhuak duh a nih pawhin phalna an lak hmasak phawt a ngai a ni. He khuahkhirhna siam hian Milan leh Venice khuate pawh a nghawng tel.
Prime minister Giuseppe Conte chuan kar liam ta khan hri leng mek avang hian an ram puma school, gym, museum, nightclub leh mipui pumkhawm theihna hmun hrang hranga awmte chu khar rih turin hriattirna a ti chhuak a, he thupek hi April 3 thleng awh tura tih a ni. "Kan ram mipuite hriselna tur atana he hmalakna hi kalpui kan ni a, kan ramchhungah he hri hi a darh zel loh nan kan theihtawp kan chhuah tlan a ngai a ni", tiin PM Conte chuan a sawi.
Italy-ah hian Covid-19 vanga thi hi mi 233 an awm tawh a, kar liam ta Inrinni khan darkar 24 chhungin mi 36 an thih belh tawh bawk a ni. He hri kai finfiah tawh hi mi 5,883 an tling tawh bawk. He hri kai, uluk taka enkawl an nih hnua damdawi-in aṭanga chhuah tawhte hi mi 589 an awm tawh bawk.
Covid-19 hri darhna bulpui, China tih lohah chuan chuan he hri vanga thi hi Italy-ah hian an tam ber tawh a ni. Thite hi kum lama upa zawk leh, a hma aṭanga natna bengvawn lo nei sa te an ni tlangpui.
Khawvela Covid-19 hri len dan dinhmun tlangpui
Khawvel ram hrang hrang 102-ah he hri hi a darh tawh a, he hri kai hi khawvel pumah mi 106,465 an awm tawh bawk. Hri vanga thi mi 3,600 awm tawhin, hri kai zinga enkawl dam hi mi 60,228 an tling tawh bawk a ni.
Covid-19 vanga thi hi a hri kai zawng zawng aṭanga 6% an ni. Tuna he hri kai mek finfiah tawh zinga 86% hi dinhmun hlauhthawn awm lo niin, 14% chu dinhmun hlauhthawnawm leh enkawl uluk ngai an ni thung. India-ah hian he hri kai hi mi 40-an awm tawh nia hriat a ni a, vanneihthlak takin thihpui erawh an la awm lo.