Myanmar sipaiten celebrity-te an bitum Celebrity 40-te manna thupek tichhuak

Myanmar sipai rorelna duh lohna lantirin mipuiten khawpui hrang hrangah nawrh an la huaihawt chhunzawm zel. Nawrh huaihawt hi an ram mi lar tam takin an zawm a, heng mite hi sipaite chuan bitumin, Inrinnia sipai rorelna dodaltu zinga tel, celebrity 40-te manna tur thupek a tichhuak.

Sipaiten man tura thupek an tihchhuahte hi social media lama huhang nei tak tak, zaithiam leh model-te an ni a, armed force-te dodal tura mipuite fuiha puhin thubuai an siamsak a ni. An thubuaiah hian thiam loh chantir an nih chuan kum thum thleng lung-in tantir theih an ni ang. Mahse celebrity man tura a tih tam zawk hi an bibo mek a ni.

Sipai dodalna thu thehdarh nan Easter egg hmang

Nimina Easter Sunday puala easter egg siamte chu sipai rorelna duh lotute chuan sipaite dodalna thu leh mipuite infuihna thu hrang hrang ziaka thehdarhna atan an hmang.

Inrinni zan khan ram pumah February 1-a sipai chakna hmanga mipui thlan sorkar paihthlak a nih hnua nawrh huaihawtnaa sipai kut tuar thite sunna hun hmangin bati chhit a ni. Assistance Association for Political Prisoner chuan Inrinni liam ta thleng khan sipai kut tuar hian mi 557 an thi tawh a, mi 2,658 man an ni tawh bawk niin a sawi.

Sipaite kut tuara thi an awm belh reng chungin mipuite hian nitin khawpui hrang hrangah nawrh an la huaihawt chhunzawm reng a ni. Hetih lai hian sipaite chuan mipuite hi kawng hrang hrangin a hrek chho mek a, Zirtawpni khan wireless broadband a titawp a, mi tam zawkin internet an hmang thei tawh lo.

Total-in gas siam titawp dawn lo

Foreign company hrang hrangte chu Myanmar-a sipai sorkar an thawhpuina titawp tura ngen an ni a, hetih lai hian France energy company lian, Total chuan Myanmar rama gas siam hna chu tihtawp a tum lo tih Inrinni khan a sawi.

Chief executive Patrick Pouyanne chuan Total chuan mawhphurhna lian tak a nei tih sawiin, "Mi maktaduai telte hnenah electricity supply chu a titawp ngawt thei lo a, hei hi titawp a nih chuan damdawi-in leh sumdawnna hrang hrangten an buai phah zawk dawn a ni," a ti. Myanmar sipaite chet dan an dem thu a sawi rualin, Pouyanne chuan Myanmar mipuite harsatna nasa tak tawk mekte phurrit siambelh tura chet an tum lo tih a sawi a ni.

Hetih lai hian Italian fashion brand Benetton leh Swedish retailer H&M chuan Myanmar aṭanga order thar lak a titawp a, France power grup EDF pawhin a hna thawh a titawp bawk.