Jordan prince pawn chhuak thei loin hreng

Jordan lal, King Abdullah II unaupa, prince Hamzah bin al Hussein chuan pawn chhuak thei loin, house arrest-a hren a nih thu a sawi a, an ram sorkar inrelbawlna chu nasa takin a sawisel zui bawk.

Inrinni liam ta khan Prince Hamzah hian video tichhuakin house arrest-a hren a nih thu hi a sawi a, mahse Jordan sipaite chuan man a nih loh thu sawiin, Jordan ram security leh muanna tichhe thei zawnga thil ti lo tura ngen a ni ringawt tih an sawi thung.

Sipaite chuan Prince Hamzah warning pek a nihna chhan hi minister hlui, lal chhungkaw member pakhat leh midang ṭhenkhatte chungchanga security investigation neih meka an hmalakna kal zel a ni tih an sawi bawk. Mahse Prince Hamzah hian he thilah hian in­hnamhnawihna a nei lo tih sawiin, pawn chhuah phalsak a ni lo a, midangte a biak leh a hmuh pawh an khapsak niin a sawi. A security detail pawh paihsak niin, phone leh internet service pawh titawp sak a ni tih thu a sawi bawk.

Prince Hamzah chuan meeting pakhat, an ram lal an sawiselnaah a tel ve avanga an hremna a ni tih a sawi a, mahse meeting-ah pawh hian lal sawiseltu zingah a tel lo tih a sawi bawk. Prince Hamzah hi crown prince atana puan lo ni tawh mah se, kum 2004 khan a title hi hlih sak a ni.

Hetih lai hian Egypt leh Saudi Arabia-te chuan King Abdullah an thlawp thu an sawi a, US pawhin Jordan lal hi an thlawp tih a sawi bawk a ni.