Trump-a'n White House chief of staff a thlak

US president Donald Trump chuan White House chief of staff lailawk Mick Mulvaney chu a thlak a, North Carolina lawmaker Mark Meadows chuan a ai a awh dawn tih a sawi. 

Mark Meadows chuan tun kar chhung hian chief of the staff office hi a luah hman rin a ni. Donald Trump chuan Mick Mulvaney hi Northern Ireland-ah US special envoy a nih chhun­zawm dawn tih a sawi. Trump hian Mulvaney hi a thlak dawn niin thuthang a awmna a rei tawh hle a, tunah erawh a thlak dawn ta tak tak a ni. 

Mulvaney VS Trump 

Nikum October khan Mulvaney hian White House-ah press conference koin Ukraine leh Trump inkar boruak, Trump-a'n Ukraine a vau nia puhna kal lai khan 'hetiangte chu kan ti fo alawm' tiin a sawi a, hei hian President pawh a thinur hle nia sawi a tam hle nghe nghe. 

Mahse Mulvaney hian a thusawi hi a sut lehnghal a, ziaka thuchhuah siam lehin kum 2016 inthlanpui chungchangah khan Ukraine sipai-te ṭanpuina emaw an ram nena inzawmna emaw engmah a awm lo tih a tarlang leh thung.

Trump-a chief of the staff thar tur Mark Meadows hi a ṭhian hnai tak a ni. Kum 2012-a khatih hunlaia president, Barack Obama, Kenya-a piang a nih thu vantlang hmaa sawi vak tawhtu kha a ni.

Zirtawpni zan khan Trump chuan a twitter-ah Mark nen chuan hun rei tak an thawh dun tawh thu leh inlaichinna ṭha tak a neih thu a sawi.