Inkahhai puan bawhchhiat a ni lo : Turkey

Turkey defence mi­nister Hulusi Akar chuan Syria Idlib province-a inkahhai puan mek bawh­­­chhiatna a awm nia tual­chhung mite'n an sawi chu thu dik lo a ni tih sawi­in, inkahhai puan bawh­­chhiatna a la awm lo, a ti.

Russia leh Turkey chuan Ningani liam ta tlaiah khan Moscow-a darkar ruk lai inbiakna an neih hnuah inkahhai an puang a ni. Mahse tualchhung mite chuan inkahhai puan a nih hnu darkar rei loteah khan thlawhtheihna hmanga inbeihna a thleng niin an sawi. 

Turkey Defence Mi­nister chuan heihi chhang let vatin inkahhai bawhchhiat a nih lohna tur chuan hma kan la zel dawn. Inkahhai bawhchhiatna a la thleng lo a ni. Mahse beih kan tawh erawh chuan kan sahimna turin kah let theihna turin dikna chanvo kan nei a ni, a ti.

Syria-ah hian kum kaw chhung lai chu tualchhung indona a thleng tawh a, Turkey leh Russia hian NATO member ve ve mah nise an thlawp lam a inang lo. Russia chuan president Bashar al-Assad an thlawp laiin Turkey lam hi chuan sorkar dodal lam an thlawp thung. 

Russia lam pawh hian Zirtawpni khan chuan indo boruak pawh a ziaawm nghal hle tih sawiin, thlawhtheihna hmanga inkahna pawh a thleng tawh lo tih an sawi ve bawk.