Indonesia-in inthlanpui nei

Indonesia ram inthlanpui chu nimin khan neih a ni a, President, Parliament member bakah regional legislative member tur an thlang.

Khawvela muslim tam berna ram leh democracy ram lian pathumna, Indonesia-ah hian vote nei mi maktaduai 192 chuang an awm a, candidate 245,000 chuang an awm bawk. Vote thlakna polling station 800,000 chuang siam a ni.

An ram huna zing dar 7 aṭangin polling station-ah vote thlak ṭan a ni. Indonesia ram hi thliarkar 17,000 zet awmna niin time zone pathum an hmang. Khawchhak lam bialah vote hi thlak hmasak ber niin, a hnu darkar khatah central region-ah an thlak ve ṭan a, darkar hnih hnu­­ah an ram khawpui Jakarta leh khaw­thlang lam bialah an thlak ṭan ve leh bawk. Tlai dar 1 thleng vote thlak hun hi hawn a ni.

Voter-te chuan ballot paper panga hmangin president, vice president, national leh regional legislative member turte an thlang a ni. Vote thlak hun a tawp rualin vote tla hi chhiar nghal a ni dawn a, result hi nizan la la khan hriat theih beisei a ni. Official result erawh chu May thlaah tihchhuah a ni ang.

Inthlanna felfai taka neih a nih theih nan venhim hna thawk turin police leh sipai 250,000 bakah paramilitary officer maktaduai 1.6 vel zet duty tir an ni.

President thlannaah hian President ṭanglai Joko Widodo chuan a chuh leh a, kum 2014 inthlana a hneh, Great Indonesia Movement party hotu, general hlui Probowo Subianto pawh a ding leh bawk. Mipui ngaihdan lak tam zawkah hian Widodo hian hma a hruai fal hle a, mahse hei hi eptu lam chuan a pawm lo tih an sawi thung. Widodo hi kum 57 mi niin a khingpui Subianto hi kum 67 a ni thung.