President Trump-an Congress bill pass a hnawl
US President Donald Trump chuan Yemen helpawlte laka beihpui thlaktu, Saudi Arabia kaihhruai Arab ṭangrual ramte thlawpna titawp tura Congress a bill pass tawh chu a thuneihna hmangin a hnawlsak.
Congress hian ram dang tualchhung indonaa US inrawlh ṭhinna tih tawpna tur War Powers Resolution chu a taka hman a nih theihna turin an pass a, mahse President Trump chuan a veto hmangin alo hnawlsak. Trump chuan he resolution hi thil ṭul lo tak, America mite leh sipai huaisen tak takte nunna tiderthawng thei zawk a nih thu a sawi.
US hian Saudi kaihhruai ṭangrual ramten Iran thlawp Yemen hel pawl, Houthi-te an beihnaah hian ralthuam dollar tluklehdingawn man hu a pe a ni. Kum 2015 aṭang khan US hian Houthi beihnaa atan hian Saudi Arabia leh United Arab Emirates (UAE) chu kawng hrang hrangin a pui a, intelligence information thlengin a pe a ni.
UAE chuan President Trump-a veto chu lawmawm a tih thu sawiin, a thutlukna siam chu a hunah tak a siam niin an sawi.
Saudi Arabia kaihhruai Arab ṭangual ramte hian Yemen ram chhung hmun hrang hrangah ṭum 19,000 chuang hel pawl lakah hian beihpui an thlak tawh a ni. Hun rei tak chhung tualchhung indona a thlen tawh avangin civil mi 60,000 velin an thih phah tawh a, mi maktaduai tel chu dinhmuh hrehawm tak, ei leh in tur ṭha pawh nei thei loin an awm phah bawk.